Madaxweynaha dowladda Federaalka Soomaaliya, Xasan Sheekh Maxamuud, ayaa khadka taleefanka kula hadlay Madaxweynaha Jamhuuriyadda Turkiga, Mudane Recep Tayyip Erdoğan.
Intii uu socday wadahadalkooda, labada Madaxweyne ayaa si qoto dheer uga wada hadlay xoojinta xiriirka laba geesoodka ah ee ka dhexeeya Soomaaliya iyo Turkiga, iyagoo si gaar ah diiradda u saaray iskaashiga dhinacyada amniga, horumarinta dhaqaalaha, iyo maalgashiga.
Madaxweyne Xasan Sheekh ayaa ugu hambalyeeyey Dowladda iyo Shacabka Turkiga dadaallada miro-dhalka leh ee nabadeed iyo wada-hadalka la xiriira kooxda PKK, isaga oo sidoo kale bogaadiyey kaalinta muuqata ee Turkigu ku leeyahay taageerada shacabka iyo dowladda Soomaaliya.
Dhinaciisa, Madaxweyne Erdoğan ayaa mar kale xaqiijiyey in Turkigu sii wadi doono taageerada uu u hayo Soomaaliya, gaar ahaan mashaariicda horumarineed iyo dadaallada lagu xoojinayo amniga iyo adeegyada bulshada.
Turkiga ayaa Soomaaliya ka taageera dhinacyada Dhaqaalaha, Waxbarashada, Amniga, Tababarada iyo qalabeynta Ciidanka.
Turkiga ayaa ka mid ah dowladaha sida weyn u taageera Soomaaliya, iyada oo xiriirka ka dhexeeya labada dal uu sii xoogeysanayo sanadihii u dambeeyay.
