Guddoomiyihii hore ee gobolka Hiiraan, Cali Jeyte Cismaan, ayaa markale hoggaaminaya abaabul dagaal oo ka socda degmada Maxaas, iyadoo ujeeddadu tahay in maleeshiyada Al-Shabaab laga saaro degmada Moqokori iyo deegaanada hoos yimaada.
Cali Jeyte oo warbaahinta la hadlay ayaa sheegay in dowladda Federaalka Soomaaliya ay ogolaatay in ciidamada deegaanka ee Macawiisley Gobolka Hiiraan ay heli doonaan xuquuqdooda bishan July.
Wuxuu sheegay in dowladda sidoo kale ballanqaaday inay garab taagan tahay Ciidamada deegaanka iyo qoysaskooda.
“Wax walba oo ku baxaya dowladda ayaa bixinaysa, waxaa la idinka rabaa in khawaarijta laga xoreeyo deegaannada, iskana qabataan dadka argagixisada tiftifka u ah,” ayuu yiri Jeyte.
Digniin adag ayuu u diray Al-Shabaab iyo kuwa taageersan”Moqokori awood naloogama qabsan, mana aanan kasoo cararin. Haddii deegaanka nalaka qabsado, magacii beesha Xawaadle waa baaba’ayaa!”
Abaabulka cusub ee ka socda Maxaas ayaa kusoo aadaya, iyadoo dagaallo culus ay ka dhaceen degmada Moqokori, kaasi oo u dhexeeya Al-shabaab iyo ciidamada Xoogga oo kaashanaya kuwa dadka deegaanka ee loo yaqaano macawiisleyda.
