Wasiirka Arrimaha Dibadda iyo Iskaashiga Caalamiga ee XFS Abdisalam Abdi Ali, ayaa kulan wax ku ool ah la qaatay Wasiirka Arrimaha Dibadda ee Jamhuuriyadda Federaalka Dalka Nigeria Amb. Yuusuf Maitama Tuggar.
Kulankaas labada dhinac ayaa yimid xilli uu soo gabagaboobay Kalfadhiga 47-aad ee Golaha Fulinta Ururka Midowga Afrika ,kaas oo ka dhacay Magaalada Malabo ee caasimadda Dalka Equatorial Guine.
Labada wasiir waxa ay ka wadahadleen xiriirka soo jireenka ah ee ka dhaxeeya labada dal ee Soomaaliya iyo Nigeria iyo in la sii wado iskaashiga dhinacyada siyaasadda, dhaqaalaha, diblomaasiyadda iyo horumarinta danaha wadaagga ah ee labada dal.
Mudane. Abdisalam Abdi Ali iyo Amb. Yuusuf Maitama Tuggar waxay isla soo qaadeen in la fududeeyo booqashooyinka madaxda ee ku aadan Muqdisho iyo Abuja, taasoo qayb ka ah dadaallada socda ee lagu xoojinayo xiriirka labada dal.
Wasiirradu waxay isku afgarteen in si dhow looga wada shaqeeyo nabadda iyo amniga gobolka, gaar ahaan xoojinta dadaallada loogu jiro ka hortagga argagixisada iyo hababka xog-wadaagga ah.
