Taliyaha cusub ee Ciidanka Difaaca Kenya, General David Keter, ayaa booqasho ku tagay magaalada Kismaayo, ee gobolka Jubbada Hoose, isaga oo sidoo kale gaaray magaalooyinka Dhobley iyo Afmadow ee gobolka Jubbada Hoose, halkaas oo ay ku sugan yihiin ciidamada Kenya ee qeybta ka ah howlgalka cusub ee Midowga Afrika, AUSSOM.
Intii uu ku sugnaa goobahaas, Taliye Keter wuxuu la kulmay ciidamada Kenya ee halkaasi ku sugan, isagoo warbixino rasmi ah ka dhageystay taliyeyaasha saldhigyada iyo saraakiisha howlgalka AUSSOM.
Wuxuu si cad u muujiyay in Kenya aysan ka hari doonin dagaalka ka dhanka ah kooxda Al-Shabaab, isagoo ballan qaaday in la xoojin doono howlgalka guud ahaan Jubbaland.
Wuxuu sidoo kale hoosta ka xariiqay sida dowladda Kenya uga goโan tahay inay garab istaagto dadaallada lagu sugayo amniga Soomaaliya, gaar ahaan xilligan adag ee uu dalka wajahayo kala guurka amni ee ATMIS uu ku wareejinayo masโuuliyadda ciidamada Soomaaliyeed.
Booqashada Taliyaha KDF ayaa kusoo aadeysa xilli ay xiisad xooggan ka taagan tahay qeybo ka mid ah Jubbaland, gaar ahaan gobolka Gedo.
Ilo wareedyo muhiim ah ayaa xaqiijiyay in dowladda Federaalka Soomaaliya ay ciidamo cusub u dirayso degmada Beledxaawo โ ciidamadaas oo laga qaaday magaalada Muqdisho, si ay u xoojiyaan kuwa dowladda ee horay u joogay halkaasi.
Sida la og yahay, degmada Beledxaawo waxaa weli ka taagan khilaaf siyaasadeed oo xooggan oo u dhaxeeya Villa Soomaaliya iyo maamulka Jubbaland, iyadoo muranka ugu weyn uu salka ku hayo damaca Villa Soomaaliya ee ku aadan kuraasta Baarlamaanka ee kasoo gala gobolka Gedo iyo guddiga doorashada la geeyo Gobolka Gedo.
