Madaxweynaha Soomaaliya, Xasan Sheekh Maxamuud, ayaa maanta gaaray magaalada Addis-Ababa ee dalka Itoobiya, halkaas oo uu kaga qeyb galayo Shirweynaha Qaramada Midoobey ee Sugnaanta Cuntada Adduunka.
Shirkan ayaa waxa ka qeyb galaya madax ka socota dalal kala duwan oo caalamka iyo gobolka Geeska Afrika ah, iyadoo diiradda lagu saarayo xoojinta sugnaanta cuntada, la-dagaallanka abaaraha, iyo dhisidda nidaamyo adkeysi u leh isbedelka cimilada.
Inta uu joogo magaalada Addis-Ababa, Madaxweyne Xasan Sheekh ayaa sidoo kale la filayaa inuu kulan gaar ah la yeesho Ra’iisul Wasaaraha Itoobiya, Abiy Ahmed.
Labada hoggaamiye ayaa ka wadahadli doona xiriirka laba geesoodka ah ee u dhexeeya Soomaaliya iyo Itoobiya, iskaashiga dhinacyada amniga, ganacsiga, iyo arrimaha gobolka.
Kulankooda ayaa lagu wadaa in xoogga la saaro sidii looga hortagi lahaa xiisadaha gobolka, iyadoo la eegayo doorarka muhiimka ah ee ay labada dowladood ku leeyihiin xasilloonida Geeska Afrika.
Shirweynahan ayaa muhiimad gaar ah u leh Soomaaliya, oo weli la tacaaleysa saameynta abaaraha, colaadaha, iyo cunto yarida, iyadoo dowladda federaalka ahna ay dadaal ugu jirto sidii loo heli lahaa taageero caalami ah oo wax-ku-ool ah.
