Wararka laga helayo degmada Doolow ee Gobolka Gedo, ayaa sheegaya in ciidamo Itoobiyaan ah oo la socda kuwa maamulka Jubbaland xalay weerar ku qaadeen xero ciidanka nabadsugida Soomaaliya ku leeyihiin degmadaasi.
Goobjoogayaal ayaa sheegay in ciidanka dowladda lagu weeraray xeradii ay joogeen, iyadoona dagaal saacado badan uu halkaasi ka socday.
Ciidamada Jubbaland iyo kuwa Itoobiya, ayaana la sheegay in ciidanka dowladda taabcasan ee joogga xerada la weeraray ku amreen in ay is dhiibaan soona wareejiyaan hubka ay heystaan, hasa ahaatee ciidamada ayaa amarkaasi diiday dagaalna la galay ciidamada huwanta ah.
Khasaaraha dhimasho iyo midka dhaawac ee ka dhashay dagaalka xalay ka dhacay degmada Doolow ayaan la ogeyn inta uu la egyahay.
Xerada xalay la weeraray ayaa la sheegay in ay joogeen ciidamo taabacsan Wasiirkii hore ee Amniga Jubbaland Cabdirashiid Janan oo dhawaan DFS usoo magacawday taliyaha NISA ee Gedo, waxaana xerada la weeraray yaalay gaadiid dagaal uu horey Janan ugu wareejiyay dowladda Soomaaliya.
