Ciidanka Booliiska Puntland ayaa digniin culus u diray shacabka, iyagoo sheegay in firxadyo ka tirsan kooxda argagixisada ah ee Daacish ay isku dayayaan in ay isku dhex qariyaan bulshada rayidka ah, kaddib cadaadis xooggan oo kaga yimid ciidamada ammaanka ee Puntland.
War rasmi ah oo kasoo baxay Booliiska Puntland ayaa lagu sheegay in dagaallamayaal katirsan kooxda Daacish, oo ku jabay dagaallo ka dhacay buuraha Calmiskad, ay hadda doonayaan in ay gabaad ka dhigtaan deegaannada ay ku nool yihiin dadka shacabka ah.
“Iyadoo laga duulayo dagaalka xaqa ah ee ciidankeenu kula jiraan kooxaha argagixisada ah, waxaa jira firxadyo ka tirsan kooxahaas oo laga yaabo inay isku dayaan inay ku dhex dhuuntaan shacabka, iyagoo ka faa’iideysanaya jabka ku dhacay,” ayaa lagu yiri qoraalka.
Booliisku wuxuu shacabka Puntland ku wargeliyay in ay si feejigan ula socdaan dhaqdhaqaaqa dadka aan la garanayn, ayna degdeg ula soo xiriiraan hay’adaha ammaanka haddii ay arkaan ama uga shakiyaan cid xiriir la leh kooxaha argagixisada.
“Ciidanka Booliska Puntland wuxuu ku wargelinayaa shacabka sharafta leh in qof kasta oo arka ama maqla cid looga shakisan yahay inay xiriir la leedahay kooxahaas naf-la-caariga ah” ayaa lagu xusay war-saxaafadeedka.
Kooxda Daacish ayaa muddooyinkii u dambeeyay ku dhuumaaleysanaysay buuraha Calmiskad ee gobolka Bari, balse howlgalada ciidamada Puntland ayaa sabab u noqday inay lumiyaan goobo muhiim ah, taasoo keentay in xubno badan oo kooxda ka tirsan ay kala firxadaan.
