Dowladda Federaalka Soomaaliya ayaa si kulul u dhaliishay Golaha Ammaanka ee Qaramada Midoobay, iyadoo ku eedeysay inuu ku guuldareystay dhaqangalka qaraarrada loogu talagalay ilaalinta xuquuqda aasaasiga ah ee shacabka Gaza.
Wakiilka joogtada ah ee Soomaaliya u fadhiya Qaramada Midoobay, Abuukar Cusmaan Baalle, ayaa sheegay in xaaladda Gaza ay si xawli ah uga sii dareyso, iyadoo dagaalka Israa’iil uu sababay gaajo ba’an, masiibo bini’aadantinimo iyo dhibaato joogto ah oo si gaar ah u saameynaya haweenka iyo carruurta.
“Golaha Ammaanka wuxuu ku guul darreystay dhaqan-galka qaraarradii ku baaqayay joojinta dagaalka, sii deynta maxaabiista, fududeynta gaarsiinta gargaarka, iyo ilaalinta sharciga caalamiga ah,” ayuu yiri Baalle.
Diblomaasiga Soomaaliya ayaa caddeeyay in dalkiisu mar kale garab taagan yahay shacabka Falastiin, isagoo ku baaqay:
In la soo afjaro qabsashada dhulka Falastiin.
In la joojiyo dagaalka joogtada ah.
In xorriyadooda dib loo siiyo dhammaan dadka si aan sharci ahayn loo xidhay.
In dib loo bilaabo hab siyaasadeed oo lagu gaari karo xalka laba-dawladda ah.
Wakiilka Soomaaliya ayaa sidoo kale bogaadiyay dadaallada Qatar, Masar iyo Maraykanka ee ku aaddan nabad raadinta, isagoo rajo ka muujiyay in shirka Golaha Guud ee Qaramada Midoobay ee toddobaadka soo socda uu horseedi doono nabad waarta iyo cadaalad dhab ah.
Ugu dambeyntiina, Soomaaliya waxay ku adkaysatay inay ka go’an tahay raadinta nabad waarta oo ku dhisan qiyamka iyo dastuurka Qaramada Midoobay, si loo soo afjaro qabsashada muddada dheer socotay ee dhulka Falastiin.
