Banaanbax ballaaran oo ay ka qeyb galeen boqolaal kamid ah shacabka ayaa maanta waxaa uu ka dhacay Magaalada Baydhabo ee Gobolka Banaadir.
Dadkan ayaa si weyn uga soo horjeeday diidmada qaar kamid ah ganacsatada ee qaadashada lacagta Shilinka Soomaaliga.
Sidoo kale Bannaan baxayaasha ayaa waxaa ay siteen boorar islamarkaana ku qeylinayay hal ku dhigyo ay ka mid ahaayeen “Dollar dooni meyno, lacagteena ayaan rabnaa.”
Dadka bannaanbaxayay ayaa dalbaday in si degdeg ah wax looga qabto xaaladda lacagta Shilinka Soomaaliga oo ay sheegeen in isticmaalkeeda la diiday.
Qaar kamid ah shacabka oo la hadlay Warbaahinta ayaa sheegay in diidmada Shilinka Soomaaliga ay saameyn ku yeelatay nolol maalmeedka dadka, isla markaana ay keentay jahwareer dhaqaale iyo culays ku yimid isticmaalka lacagta waddanka.
Taliyaha Booliska Gobolka Baay, Gaashaanle Dhexe Sadiiq Aadan (Doodishe), oo goobta bannaanbaxa ka hadlay, ayaa ku amray ganacsatada Magaalada Baydhabo inay si buuxda u qaataan Shilinka Soomaaliga, isagoo uga digay in cid kasta oo diida laga qaadi doono tallaabo sharci ah.
Taliyuhu wuxuu sheegay in boolisku uu ka go’an yahay ilaalinta nidaamka lacagta dalka iyo kala dambeynta suuqyada, isla markaana aan la aqbali doonin waxyaabo carqalad ku ah isticmaalka lacagta rasmiga ah.
