Qofka falka gaystay waxaa la sheegay in ahaa nin reer Austria ah oo 21 jir ah kana soo jeeda deegaanka Graz, sida ay booliiska deegaanka xaqiijiyeen. Booliisku waxay sheegeen in ninkaas isdilay isagoo ku jira musqusha dugsiga. Wali waxay wadaan baaritaanka si loo ogaado sababta uu u sameeyey weerarka.
Shir jaraa’id oo ka dhacay Graz ayaa hadda dhammaaday, balse intii su’aalo laga weydiinayay saxaafadda, booliisku waxay xaqiijiyeen in ninkii weerarka geystay uusan horey ugu diiwaangashayn booliiska ilaa maanta.
Booliska ayaa sheegay in ninka laga shakisan yahay uu ku hubeysnaa labo qori oo lagu hubiyay goobta uu fal dambiyeedka ka dhacay, taasi oo ay sheegeen in ay salka ku heyso aqoonta ciidanka booliska.
Booliisku waxay sheegeen inuu si sharci ah u lahaa labadii qori ee loo adeegsaday weerarka, sidoo kalena uu haystay shatiga hubka. Wasiirka Arrimaha Gudaha ee Austria, Gerhard Karner, wuxuu xaqiijiyay in dhibbanayaashu ay ahaayeen sagaal qof: lix dumar ah iyo saddex rag ah. Waxaa kale oo dhaawacmay 12 qof oo kale, ayuu yiri.
Wasiirka arrimaha gudaha Gerhard Karner ayaa sheegay in tuhmanuhu uu ahaa arday wax ka baran jiray iskuulkii uu weerarku ka dhacay, balse uusan qalin jebin.
