Booliska Soomaaliya ayaa maanta soo bandhigay ciidamo tiro badan oo ka qeyb qaadanaya sugidda amniga goobaha ay ka dhacayaan doorashada Golaha Deegaanka ee Gobolka Banaadir, taas oo lagu wado inay berri qabsoonto, kuna beegan 25-ka bisha.
Taliyaha Ciidanka Booliska Soomaaliyeed, Sarreeye Guuto Asad Cismaan Cabdullaahi, oo uu wehliyo Taliye ku-xigeenka Sarreeye Guuto Cismaan Cabdullaahi, ayaa kormeeray ciidamo loo asteeyay sugidda amniga doorashada, kuwaas oo loo kala diray fariisimaha horey loo qorsheeyay inay ka howlgalaan.
Taliyaha ayaa saraakiisha iyo ciidamada ku boorriyay inay waajibaadkooda u gutaan si hufan, mas’uuliyad leh, isla markaana ay mudnaan siiyaan danta dalka, dadka iyo amniga guud.
Waxa uu si gaar ah u faray in la daryeelo muwaadiniinta ka midka ah waayeelka, dadka naafada ah iyo hooyooyinka, si ay codkooda ugu dhiibtaan si nabad ah oo habsami leh.
booliska Soomaaliya ayaa ballan qaaday inay qaadi doonaan tallaabooyin amni oo dhammeystiran, si loo xaqiijiyo in doorashada Golaha Deegaanka Gobolka Banaadir ay ku dhacdo jawi amni iyo kala dambeyn leh, islamarkaana muwaadiniintu u gutaan waajibaadkooda codbixineed iyaga oo aan cabsi qabin.
