Madaxa Guud ee Hay’adda Qaramada Midoobay ee Taakulaynta Qaxootiga Falastiin (UNRWA), Philip Lazzarini, ayaa sheegay in carruurta ku nool Gaza ay halis ugu jiraan inay qabowga daran ee jiilaalka u dhintaan, iyagoo wajahaya hoy la’aan iyo agab la’aan.
Qoraal uu ku daabacay bartiisa X, Lazzarini wuxuu xusay in aan weli ogolaansho loo siin gelitaanka alaabaha muhiimka ah ee Gaza, oo ay ka mid yihiin bustayaal, iyo agab kale oo lagama maarmaan u ah xilliga qabowga.
Wuxuuna ku baaqay in si degdeg ah loo joojiyo dagaalka oo xabbad-joojin rasmi ah la sameeyo, si loo hubiyo in gargaar bini’aadantinimo si nabad ah loo gaarsiiyo dadka u baahan, gaar ahaan alaabaha jiilaalka oo dadka badbaadin kara.
Dhinaca Kale, Barnaamijka Cuntada Adduunka (WFP) ayaa sheegay in xaaladda gaajada ee Gaza ay sii xumaanayso, iyadoo dad badani aysan helin cunto ku filan nolol-maalmeedkooda.
WFP wuxuu caddeeyey in ilaa hadda ay keeneen saddex-meelood meel ka mid ah cuntadii dadka Gaza ay u baahnaayeen, taas oo aan waxba ka tarin baahida guud.
Bayaan lagu daabacay barta X, ayay Hay’adda WFP ku baaqday in la xaqiijiyo marin nabdoon oo la sii marsiin karo cunto iyo sahay kale oo muhiim ah.
WFP ayaa ku baaqday in xabbad-joojin degdeg ah ay tahay dariiqa kaliya ee lagu badbaadin karo nolosha dadka ku nool Gaza.
