Mucaaradka M23 ee bariga Jamhuuriyadda Dimuqraadiga ee Congo ayaa sheegay inay hadda si buuxda ula wareegeen magaalada Uvira – taasoo ahayd magaalada ugu dambeysay ee dowladda gacanta ku haysay ee gobolka Koonfurta Kivu.War-saxaafadeed, mucaaradka ay taageerto Rwanda ayaa ku baaqay in ciidamada Congo ee harsan ay isdhiibaan.
Mas’uuliyiinta deegaanka ayaa xaqiijiyay joogitaanka dagaalyahannada ee xarunta guddoomiyaha gobolka iyo hoolka shirarka ee magaalada.
Magaalada Uvira waxaa dhowr kiiloomitir oo keliya u jirtaa dalka deriska la ah ee Burundi, halkaas oo kumanaan rayid ah ay u barakaceen.Kooxda mucaaradka M23 ayaa hadda xirtay xuduudda.
Mucaaradku waxay magaalada qabsadeen wax ka yar toddobaad kadib heshiiskii nabadeed ee ay wadeen Maraykanka, Congo iyo Rwanda.
Wasiirka arrimaha dibadda ee Burundi ayaa qabsashada magaalada ku tilmaamay ceeb madaxweyne Trump.
