Dowladda Federaalka Soomaaliya ayaa si kulul u cambaareysay falkii argagaxa lahaa ee magaalada Hargeysa lagu gubay afar carruur ah, kaasi oo sida ay sheegeen dad goob-joogayaal ah uu geystay aabahood.
Wasaaradda Qoyska iyo Horumarinta Xuquuqul Insaanka oo warsaxaafadeed soo saartay ayaa sheegtay in falkaasi foosha xun uu yahay mid ka hor imaanaya diinta Islaamka, dhaqanka iyo damiirka bulshada Soomaaliyeed, isla markaana uu yahay tacaddi aan marnaba la aqbali karin.
Warbixinta wasaaradda ayaa intaas ku dartay in falkaasi uu salka ku hayo khilaaf qoys oo u dhexeeyay hooyada iyo aabaha carruurta, balse aysan jirin wax sabab ah oo loo raadin karo in la gubo carruur aan waxba galabsan.
Wasaaradda ayaa ugu baaqday hay’adaha amniga ee magaalada Hargeysa in ay si degdeg ah u sameeyaan baaritaan dhammeystiran, isla markaana eedeysanaha la horkeeno cadaaladda si loo helo xaq-soor buuxa.
Sidoo kale, wasaaradda ayaa bulshada Soomaaliyeed ugu baaqday in ay muujiyaan feejignaan iyo isu-tanaasul, isla markaana aysan khilaafaadka qoysaska u oggolaan in ay isu beddelaan falal rabshado iyo dilal naxdin leh.
Ugu dambeyn, Wasaaradda Qoyska iyo Xuquuqul Insaanka ayaa xaqiijisay in ay ka go’an tahay difaaca iyo ilaalinta xuquuqda carruurta iyo haweenka Soomaaliyeed, iyadoo iskaashaneysa hay’adaha amniga iyo bulshada rayidka ah si loo xoojiyo nabadda iyo amniga qoysaska Soomaaliyeed.
