Wasaaradda Amniga Gudaha ee Dowladda Federaalka Soomaaliya ayaa si rasmi ah u shaacisay in ay si dhow ula socoto dhaqdhaqaaqyada xasilooni-darrada ah ee weli ka socda Gobolka Gedo, kuwaas oo lagu eedeeyay in ay hurinayaan xubno qaswadayaal ah oo uu amar siiyay Axmed Madoobe, madaxda Jubbaland.
Qoraal rasmi ah oo kasoo baxay Wasaaradda ayaa lagu sheegay in xubnahaasi ay ku howlan yihiin abaabul dagaal iyo marin habaabin dadweyne si ay u qariyaan dambiyada ay faraha kula jiraan. Waxaa war-saxaafadeedka lagu xusay in Maxamuud Sayid Aadan uu ka mid yahay shaqsiyaadka horey gacanta ugu lahaa falal amni-darro oo ka dhacay gobolka, isla markaana maalmahan dambe lagu tuhunsan yahay inuu xiriir la leeyahay dhaqdhaqaaqyada hadda socda.
Wasaaradda ayaa caddeysay in Ciidanka Qaranka Soomaaliya oo taageero ka helaya shacabka deegaanka ay howlgallo ka wadaan gobolka, kuwaas oo lagu xaqiijinayo amniga, xasiloonida, iyo ciribtirka kooxaha Khawaarijta ah.
War-saxaafadeedka ayaa si toos ah digniin ugu diray shaqsiyaadka iyo kooxaha ku hawlan hurinta xiisadaha siyaasadeed iyo amni-darro. Dowladda ayaa sheegtay in dhaqdhaqaaqyadooda lala socdo, isla markaana lala xisaabtami doono haddii ay sii wadaan falkan liddi ku ah dowladnimada.
