Hay’adda Baarista Federaalka Mareykanka ee FBI-da ayaa shaacisay inay gacanta ku dhigtay Saciid Cabdullaahi Ereg oo Soomaali ah, kaas oo muddo dheer si weyn loo raadinayay kadib markii lagu eedeeyay musuqmaasuq maaliyadeed oo balaayiin shilin ah.
War kasoo baxay FBI-da iyo Waaxda Cadaaladda Mareykanka ayaa lagu sheegay in Ereg uu 10-kii Juun si nabad ah isku soo dhiibay ciidamada ammaanka Mareykanka kadib markii magaciisa lagu daray liiska cusub ee “Most Wanted Fraudsters” ee dadka loogu raadinta badan yahay dambiyada khiyaanada maaliyadeed.
Mas’uuliyiinta Mareykanka ayaa ku eedeeyay Saciid Cabdullaahi Ereg inuu ku lug lahaa qorshe lagu lunsaday in ka badan 4.2 milyan oo doolar oo ka tirsanaa barnaamijka quudinta carruurta ee dowladda Mareykanka xilligii cudurka COVID-19. Lacagtaasi ayaa loogu talagalay carruurta u baahan gargaar cunto, gaar ahaan gobolka Minnesota.
Sida lagu sheegay dukumiintiyada maxkamadda, Ereg wuxuu maamulayay dukaan iyo maqaaxi ku yaallay magaalada Minneapolis, kuwaas oo ku jiray barnaamijka “Feeding Our Future.” Dowladda Mareykanka ayaa ku andacootay in xaruntaasi si been abuur ah u sheegtay inay malaayiin cunto ah siisay carruurta, si ay u hesho lacagaha dowladda.
FBI-da ayaa sheegtay in Ereg uu wajahayo dacwado ay kamid yihiin khiyaano maaliyadeed, isku day khiyaano iyo lacag dhaqid, iyadoo la sheegay inuu qayb kamid ah lacagahaasi u wareejiyay xisaabaad dibadda ah si loogu maalgeliyo nolol raaxo leh.
Mas’uuliyiinta Mareykanka ayaa sidoo kale sheegay in Ereg uu ahaa qofkii ugu horreeyay ee la qabto kadib markii FBI-du dhawaan soo saartay liiska cusub ee dadka loogu raadinta badan yahay dambiyada musuqmaasuqa.
