Warar soo baxaya ayaa sheegaya in xubnaha mucaaradka ah ee ku midoobay Golaha Mustaqbalka Soomaaliyeed, oo ay ku jiraan Puntland iyo Jubbaland, ay warqado dhowr ah u direen beesha caalamka.
Warqadaha ayaa la sheegay in loo kala diray safaarado iyo hay’ado caalami ah, oo ay ku jirto Qaramada Midoobay, iyadoo mucaaradku ku gudbinayaan walaacyadooda ku saabsan xaaladda siyaasadeed, amniga iyo khilaafka ka taagan doorashooyinka iyo dastuurka Soomaaliya.
Mid ka mid ah codsiyada ugu waaweyn ayaa la sheegay inuu yahay in dib loo soo celiyo cunaqabatayntii hubka ee Soomaaliya, iyadoo Golaha Mustaqbalka uu ku dooday in hubka iyo agabka milatari loo adeegsaday khilaafaadka siyaasadeed ee gudaha dalka.
Golaha ayaa sidoo kale Qaramada Midoobay iyo beesha caalamka ka codsaday in la taageero wada-hadallo siyaasadeed oo loo dhan yahay, kuwaas oo ay ka qayb galaan dhammaan dhinacyada ay khuseyso xaaladda Soomaaliya.
Mucaaradku waxay sidoo kale dalbanayaan in heshiis kasta oo laga gaaro wada-hadallada loo sameeyo dammaanad-qaad caalami ah iyo hannaan lagu hubinayo hirgelintiisa, si aan heshiisyada siyaasadeed mar kale u burburin.
Warqadaha ayaa sidoo kale lagu gudbiyay walaacyo ku saabsan khilaafka siyaasadeed ee dalka, gaar ahaan arrimaha doorashooyinka, dastuurka iyo mustaqbalka nidaamka siyaasadeed ee Soomaaliya.
Golaha Mustaqbalka Soomaaliyeed ayaa horey uga qayb qaatay dadaallo ay beesha caalamku ku dhex-dhexaadinaysay Dowladda Federaalka iyo mucaaradka, iyadoo dhinacyadu raadinayeen hannaan siyaasadeed oo la isla oggol yahay.
Sidoo kale, warqaddan ayaa imanaysa kaddib markii Golaha Mustaqbalka uu horay qoraal ugu gudbiyay dhinacyadii ka qaybgalayay shirkii Kampala, kaas oo looga hadlayay mustaqbalka ciidamada shisheeye ee Soomaaliya ka taageera dhinaca amniga.
Xilligaas, mucaaradku waxay dalbadeen in Soomaaliya loo sameeyo hannaan ku-meel-gaar ah oo lagu maareeyo arrimaha doorashooyinka, iyagoo ku dooday in muddo-xileedka Dowladda Federaalka uu dhammaaday, isla markaana aysan ku kalsoonayn in dowladda hadda jirta ay si madax-bannaan u maamusho hannaanka doorashada.
Dalabyadan cusub ayaa ku soo aadaya xilli khilaafka u dhexeeya Dowladda Federaalka iyo qaar ka mid ah dhinacyada mucaaradka uu weli ka taagan yahay arrimaha doorashooyinka, dastuurka iyo qaabka loo maareynayo kala-guurka siyaasadeed.
Haddii codsiyada Golaha Mustaqbalka ay helaan taageero caalami ah, waxay arrinta Soomaaliya gelin kartaa marxalad cusub oo wada-hadal iyo dhex-dhexaadin ah, halka dowladda Federaalka iyo dhinacyada kale ay weli hayaan mowqifyo kala duwan oo ku saabsan sida loo wajahayo khilaafka.
