Warbixin ay daabacday Fox News ayaa lagu seegay in Somaliland muhiimad sii kordhaysa ku leedahay dhinaca amniga gobolka, xilli ay sii xoogaysanayaan xiisadaha u dhexeeya Iran, Maraykanka iyo kooxda Xuutiyiinta ee Yemen. Warbixintu waxay sheegtay in quwadaha reer galbeedku ay Somaliland u arkaan meel leh muhiimad juqraafiyeed oo weyn.
Sida lagu sheegay warbixinta, Iran ayaa walaac ka muujisay suurtagalnimada in Maraykanka iyo xulafadiisu isticmaalaan dekedda iyo madaarka Berbera si ay u xoojiyaan hawlgallada amni ee gobolka. Berbera waxay ku taallaa meel muhiim u ah marin-biyoodka Bab el-Mandeb oo ay maraan maraakiib badan oo ganacsi iyo shidaal sida.
Khubaro dhinaca siyaasadda iyo amniga ah oo Fox News la hadlay ayaa sheegay in Somaliland ay noqon karto goob muhiim u ah la socodka dhaqdhaqaaqyada Xuutiyiinta iyo ilaalinta isu socodka maraakiibta Badda Cas. Qaar ka mid ah falanqeeyayaashu waxay sheegeen in arrintan ay walaac ku hayso Iran maadaama Xuutiyiinta ay ka mid yihiin kooxaha ay taageerto Tehran.
Wasiirka Arrimaha Dibadda Somaliland Cabdiraxmaan Daahir Aadan ayaa warbaahinta u sheegay in Somaliland ay diyaar u tahay iskaashi dhinaca amniga ah oo ay la yeelato Maraykanka iyo waddamada kale ee daneeya xasilloonida gobolka. Wuxuu xusay in Somaliland ay muhiimad gaar ah u leedahay ammaanka xeebaha iyo marinnada ganacsiga caalamiga ah.
Warbixintu waxay sidoo kale sheegtay in saraakiil ka tirsan AFRICOM ay booqashooyin ku tageen Somaliland bilihii la soo dhaafay si ay ula socdaan arrimaha amniga iyo iskaashiga gobolka. Ilo kala duwan ayaa sheegay in Maraykanku danaynayo inuu helo marin dheeraad ah oo uu kaga hawlgalo gobolka Badda Cas.
Dowladda Maraykanka ayaa marar badan sheegtay in ay aaminsantahay midnimada Soomaaliya, inkasta oo ay jirto wada-shaqayn amni oo ay la leedahay Somaliland. Warbixinta Fox News ayaa muujisay in Somaliland ay si tartiib tartiib ah uga dhex muuqanayso doodaha la xidhiidha amniga gobolka iyo loollanka istaraatiijiyadeed ee Geeska Afrika iyo Badda Cas.
