Madaxweyne Ku-xigeenka Koowaad ee maamulka Jubbaland Maxamuud Sayid Aadan ayaa tacsi tiiraanyo leh u diray Ehelada, Qaraabada, Saaxiibada iyo guud ahaan Shacabka Soomaaliyeed, gaar ahaan reer Jubaland, geeridii naxdinta lahayd ee ku timid Alle ha u naxariistee Gaashaanle Sare Xuseen Cali Xaashi (Xuseen Giif) iyo Taliye Farxaan Odowaa, kuwaas oo ku geeriyooday dagaalkii lagu soo qaaday Ciidanka Jubaland ee kusgnaa degmada Beledxaawo.
Sidoo kale, Madaxweyne Ku-xigeenka ayaa tacsi u diray dhammaan ciidamadii Soomaaliyeed ee ku geeriyooday dagaalkaas, isagoo dhaawacyadana Alle uga baryay bogsasho degdeg ah.
Madaxweyne Ku-xigeenka ayaa ku tilmaamay dhacdadan mid murugo iyo niyad-jab weyn u horseeday shacabka, isagoo si adag u cambaareeyay in ciidamo Soomaaliyeed oo loo dhaariyay difaaca dalka iyo ka hortagga cadawga loo adeegsado dano gaar ah oo wiiqaya nidaamka iyo hay’adaha Jubaland. Wuxuu carabka ku adkeeyay in cid kasta oo ku lug leh falalkan ay wajihi doonto xisaabtan buuxa.
Ugu dambeyn, wuxuu Alle SWT uga baryay inuu Jannada Firdowsa ka waraabiyo dhammaan marxuumiinta, ehelkoodii iyo qaraabadoodiina uu siiyo samir iyo iimaan.
