Ugu yaraan 68 muhaajiriin Afrikaan ah ayaa ku dhintay duqeyn ay ciidamada Mareykanka ka fuliyeen xarun ay Xuutiyiintu maamulaan oo ku taalla magaalada Sacda ee waqooyiga Yemen. Xaruntaas oo ahayd meel lagu hayo muhaajiriinta doonayay inay galaan Sacuudi Carabiya, ayaa la duqeeyay xilli hore oo aroor ah.
Ibraahim Cabdulqaadir Macallin, oo ka mid ah Soomaalida ku nool Yemen, ayaa BBC-da u sheegay in goobta la duqeeyay laga soo qabtay muhaajiriin doonayay inay xadka ka gudbaan, kuwaasoo loo diyaariyay in dib loo tarxiilo. Wuxuu sheegay in dhimashadu ay kor u dhaaftay 90 qof, halka dhaawacuna yahay 25. Wararka hordhaca ah ayaa sheegaya in 3 ilaa 4 qof oo Soomaali ah laga yaabo inay ku jireen dadka wax ku noqday, inkastoo aan la xaqiijin tiradooda rasmiga ah.
Xuutiyiinta waxay sheegeen in weerarka lagu dilay dad rayid ah iyo tiro yar oo dagaalyahanno ah, halka wararka qaarna ay sheegayaan in boqollaal xubnood oo ka tirsan Xuutiyiinta la laayay. Duqeyntan ayaa qayb ka ah dagaalka sii xoogeysanaya ee gobolka.
Jaaliyadda Soomaaliyeed ee Yemen ayaa sheegay inay si dhow ula socdaan xaaladda muhaajiriinta Soomaaliyeed ee ku sugan xuduudaha.
