Waxaa si rasmi ah u furmay shirka Golaha Guud ee Qaramada Midoobay, iyadoo ay ka qeybgalayaan madax iyo wakiillo ka kala socda dalalka caalamka.
Xoghayaha Guud ee Qaramada Midoobay, Antonio Guterres, ayaa khudbaddiisa furitaanka kaga hadlay xaaladda cakiran ee dunida, isagoo sheegay in kala-qaybsanaanta iyo khilaafaadka caalamku ay sii ballaaranayaan.
Guterres ayaa tilmaamay in dunidu ay ku wajahan tahay nidaam ay quwado badan awoodda ku leeyihiin, balse uu sheegay in kalsoonidii u dhexeysay dalalka iyo bulshooyinka ay sii daciifeyso.
Wuxuu sidoo kale soo hadal qaaday dagaallada iyo colaadaha socda, isbeddelka cimilada iyo saameynta sii kordheysa ee sirdoonka macmalka ah (AI).
“Awoodda waa in lagu maamulaa sharciga. Xooggu ma noqon karo garsooraha ugu dambeeya ee go’aamiya cidda nolosheeda iyo mustaqbalkeeda ay muhiim yihiin.”
Xoghayaha Guud ee Qaramada Midoobay, Antonio Guterres, ayaa sheegay in dunidu aysan lumin ama ka jeesan xaaladda “burburka iyo dhibaatada ba’an” ee ka jirta Gaza iyo dhulka Falastiiniyiinta la haysto.
