Magaalada Addis Ababa ee caasimadda Itoobiya ayaa maanta lagu qabanayaa Shirka Isbaddelka Cimillada Afrika, kaas oo lagu falanqeynayo saamaynta taban ee cimilladu ku yeelatay qaaradda iyo xalalka ay dalalka Afrika wadajirka uga hortagi karaan.
Shirkan oo ah meertadiisa labaad, ayaa lagu lafa-gurayaa qorshe mideysan oo ay Madaxda Afrika ku wajahaan khataraha sii kordhaya ee isbeddelka cimilada, iyadoo xoogga la saarayo sidii loo abuuri lahaa iskaashi iyo tallaabooyin wax ku ool ah.
Madaxweynaha Soomaaliya, Xasan Sheekh Maxamuud, ayaa khudbad ka jeedinaya shirka, isagoo ka hadli doona saamaynta isbeddelka cimilada ee dalka Soomaaliya, gaar ahaan abaaraha, fatahaadaha iyo dhibaatooyinka kale ee ka dhashay.
Madaxweynaha ayaa sidoo kale kulamo gaar-gaar ah la yeelan doona madaxda ka qaybgaleysa, oo ay ka mid yihiin ,Ra’iisul Wasaaraha Itoobiya, Abiy Ahmed iyo Madaxweynaha Jabuuti, Ismaaciil Cumar Geelle, Madaxweynaha Kenya, William Ruto
iyo mas’uuliyiin kale oo caalami ah.
Dhanka kale, madaxda Afrika ee ku sugan magaalada Addis Ababa ayaa sidoo kale ka qeyb geli doona munaasabadda furitaanka Biyo-xireenka Webiga Nile (GERD), oo Itoobiya ay dhawaan dhismahiisa soo gaba-gabeysay.
Hase yeeshee, dowladda Masar ayaa si cad uga soo horjeeda mashruuca biyo-xireenka.
Qodobkan ayaa weli xiisad siyaasadeed ka dhex abuuraya Addis Ababa, Qaahira iyo Khartoum.
