Xarunta Madaxtooyada Soomaaliya ee Magaalada Muqdisho ayaa waxaa maanta markale ka furmaya shir u dhexeeya Madaxda dowladda federalka ah ee Somalia iyo golaha mustaqbalka Soomaaliyeed.
Shirkaan oo uu gogoshiisa dhigay Madaxweynaha DFS Xasan Sheekh Maxamuud ayaa waxaa ka qaybgeli doono RW Xamse, ku-xigeenkiisa, Madaxda Puntland iyo Jubbaland, Madax hore, xubno katirsan golayaasha dowladda Somalia & siyaasiyiin katirsan golaha Mustaqbalka Soomaaliyeed.
Shirkaan ayaa looga arrinsanayaa xaaladda guud ee ay marayso Soomaaliya gaar ahaan arrimaha doorashooyinka oo siweyn loogu kala dheeraaday sanadihii ugu dambeeyey iyo waxka-beddelka dastuurka kumeel gaarka ah ee Somalia.
Xubnaha golaha Mustaqbalka Soomaaliyeed oo shalay shir ku yeeshay Muqdisho ayaa isku-raacay in ay maanta oo Axad ah iyaga oo isku-dhan ay tagaan Villa-Somalia, si loo sii amba qaado kulamadii arrimaha doorashooyinka.
Arrintaan ayaa timid kadib markii madaxtooyada Somalia diiddey Guddi ay u saareen in ay kala-hadlaan doorashooyinka, isla markaasna ay guul-darraysteen isku-dayo la doonayey in doodda lagu xalliyo shirar gaar gaar ah.
Golaha ayaa sheegay inay doonayaan doorashooyin Dadban oo ka metelaad badan kuwii hore ka hor bisha Maay, waxayna meesha ka saareen in ay ku kala qaybsan yihiin arrin taasi, iyaga oo intaasi ku daray in sidoo kale la qabto doorashooyinka KGS, Galmudug & Hirshabeelle oo muddo xileedkoodu dhammaaday.
DFS ayaa weli ku foogan waxka-beddelka Dastuurka JFS, aan waxba ka beddelin mawqifkeedii ku aaddanaa qabashada doorashooyin toos ah oo dalka oo dhan ka dhaca oo Baarlamaani ah sida uu qabo Dastuurka cusub, iyada oo ay maamulayaan Guddiga Doorashooyinka JFS.
Qodobka u furan madaxtooyada xilligaan ayaa lagu sheegay inuu yahay in haddii looga adkaado qabashada doorasho qof iyo cod ah awoodda loo celiyo odayaasha si la mid ah doorashadii hore ee Madaxweyne Xasan Shiikh ee 2012, si ay ula soo baxdo xildhibaano taageersan.
