Wasiirka Gaashaandhigga Xukuumadda Federaalka Soomaaliya, Cabduqaadir Maxamed Nuur, ayaa markii ugu horeysay shaaciyay in diyaaradaha Itoobiya ay duqeymo ka fuliyeen deegaano ka tirsan gobolka Shabeellaha Dhexe.
Wasiirka oo la hadlayay Warbaahinta Qaranka ayaa sheegay in diyaaraduhu gantaalo la dhaceen deegaanada ay ku sugan yihiin kooxda Alshabaab, balse ma sheegin wax khasaare ah oo ka dhashay duqeymahaas, isagoo sheegay in duqeymaha ay fuliyeen ciidamada Itoobiya ay ahaayeen kuwo ay hagaysay dowladda Federaalka. Wuxuu xusay in aanay suurtagal ahayn in duqeymo laga fuliyo gudaha Soomaaliya iyada oo aan dowladda la ogeysiin.
Sidoo kale, Wasiirku wuxuu xusay in Soomaaliya iyo Itoobiya ay ku heshiiyeen iskaashi amni, gaar ahaan dagaalka ka dhanka ah Al-Shabaab, isagoo tilmaamay in heshiiskii Ankara uu qeexayo wadashaqeynta labada dal ee dhinaca amniga.
Waa markii ugu horeysay ay diyaaradaha dagaalka Itoobiya ay duqeymo ka fuliyaan deegaano ka tirsan gobolka Shabeelada dhexe.
