Xafiiska Xeer Ilaaliyaha Guud ee Qaranka ayaa sheegay inuu gacanta ku hayo gal-dacwadeedyo la xiriira cayda, aflagaadada, sumcad dilka, isku dirka bulshada, faafinta muuqaallo anshax-xumo, been abuur iyo kicinta bulshada dhexdeeda, kuwaas oo qaar maxkamad la horgeeyay halka kuwo kalena ay wali ku socdaan baaritaanno.
War-saxaafadeed uu soo saaray xafiiska ayaa lagu sheegay in falalka noocan ahi ay khatar weyn ku yihiin xasilloonida bulshada, sumcadda dadka iyo kalsoonida guud ee bulshada Soomaaliyeed.
Xafiiska Xeer Ilaaliyaha Guud ayaa si cad u digay, isagoo ku wargeliyay cid kasta oo ku kacda falal ka horjeeda shuruucda dalka in tallaabo sharci ah oo adag laga qaadi doono. Waxaa lagu adkeeyay in loo baahan yahay ilaalinta sharafka, sumcadda iyo nabadgelyada bulshada Soomaaliyeed.
Sidoo kale, xafiisku wuxuu xusay in ilaalinta sharciga iyo ka hortagga dambiyada sumcad dilka iyo aflagaadada ku saleysan ay ka mid yihiin tiirarka ugu muhiimsan ee lagu xaqiijinayo nabad waarta iyo horumar bulsho oo joogto ah.
