Dowladda Federaalka Soomaaliya ayaa war rasmi ah ka soo saartay dagaal culus oo maanta ka dhacay deegaanka Jabad Godane ee Gobolka Shabeellada Dhexe, kaas oo u dhexeeyay Ciidanka Xoogga Dalka Soomaaliyeed (CXDS) iyo maleeshiyada Khawaarijta Al-Shabaab.
Warsaxaafadeedka dowladda ayaa lagu sheegay in Ciidanka Xoogga Dalka ay si buuxda u fashiliyeen weerar ay Al-Shabaab ku soo qaadeen deegaanka, isla markaana ay ciidamadu hadda si buuxda gacanta ugu hayaan Jabad Godane, kaddib markii kooxdaasi loo geystay jab xooggan iyo khasaare badan.
Sidoo kale, warbixinta ayaa lagu xaqiijiyay in hawlgal ballaaran oo sifayn iyo sugid amni ah uu haatan ka socdo deegaanka, si loo ciribtirro haraadiga maleeshiyaadka Khawaarijta ee ku dhuumaaleysanaya goobaha qaar, loogana hortago isku day kasta oo ay dib ugu abaabulan karaan ama ay ku carqaladaynayaan nabadda shacabka.
Ciidanka Xoogga Dalka Soomaaliyeed ayaa mar kale adkeeyay go’aankooda ku aaddan sii wadista dagaalka ka dhanka ah Al-Shabaab, iyagoo carrabka ku adkeeyay in ujeedkoodu yahay sugidda amniga guud, difaaca shacabka Soomaaliyeed, iyo xoreynta deegaannada ay Khawaarijtu ku dhuumaaleysanayaan.
