Madaxweynaha Soomaaliya, Xasan Sheekh Maxamuud, ayaa bilaabay booqasho rasmi ah oo uu ku tagay magaalada Qaahira ee caasimadda dalka Masar, halkaas oo si diirran loogu soo dhaweeyay isaga iyo wafdigiisa.
Booqashadan ayaa ujeedkeedu yahay xoojinta xiriirka taariikhiga ah ee ka dhexeeya Soomaaliya iyo Masar, iyo sare u qaadidda iskaashiga istiraatiijiyadeed ee dhinacyada amniga, diblomaasiyadda iyo siyaasadda, xilli ay gobolka Geeska Afrika ka socdaan isbeddello siyaasadeed oo xasaasi ah.
Inta uu ku sugan yahay Qaahira, Madaxweyne Xasan Sheekh ayaa kulan muhiim ah la qaadan doona dhiggiisa dalka Masar, Madaxweyne Cabdifataax Al-Sisi, waxaana ay ka wadahadli doonaan sidii loo mideyn lahaa dadaallada lagula tacaalayo caqabadaha amni ee ka jira gobolka, looguna xoojin lahaa ilaalinta madax-bannaanida iyo midnimada dhuleed ee Soomaaliya.
Sidoo kale, kulanka ayaa diiradda lagu saari doonaa hirgelinta heshiisyadii difaac ee horay u dhex maray labada dal, iyo doorka dowladda Masar ee ku aaddan taageerada iyo tababarka Ciidanka Qaranka Soomaaliyeed, gaar ahaan xilligan lagu jiro kala guurka howlgalada nabad-ilaalinta.
Booqashadan ayaa muujinaysa sida ay Soomaaliya iyo Masar uga go’an tahay dhisidda isbahaysi xooggan oo ku dhisan danaha wadajirka ah, iyadoo dowladda Masar ay marar badan ku celisay inay si buuxda u garab taagan tahay midnimada, madax-bannaanida iyo qarannimada Soomaaliya
