Wasiirka Caddaalada Maamulka Puntland, Maxamed Cabdi Wahaab, ayaa qoraal adag oo uu soo saaray ku dhaliilay dowladda federaalka Soomaaliya, isagoo ku eedeeyay inay ku tumaneyso dastuurka dalka, kana leexatay wadadii dowladnimada iyo midnimada shacabka Soomaaliyeed.
Wasiirku wuxuu qoraalkiisa ku bilaabay: “Wasiir 3 sano ayaa la idinka waayey, walaalayaaloow talada dhulka dhiga, dalkaan waan wada leenahe. Dastuurka dalka iyo dowladnimada kufsiga ka daaya, jidkaad ku socotaana ka jooga, horaa loogu jabaye.”
Isagoo ka hadlaya xalka laga gaari karo khilaafka siyaasadeed ee jira, Wasiir Maxamed Cabdi Wahaab wuxuu xusay afar qodob oo muhiim ah oo uu ku tilmaamay dariiqa lagu soo celin karo wadashaqeyn iyo midnimo qaran:
- In lagu soo noqdo dastuurka dalka ee la ansixiyay August 2012, kaas oo uu sheegay in uu yahay heshiis bulsho oo saldhig u ah dowladnimada Soomaaliya.
- In la aqbalo gogol wadatashi qaran, maadaama uu sheegay in madashii Wadatashiga Qaran (NCC) lagu bedelay xisbi gaar ah oo aan matalin dhammaan daneeyeyaasha siyaasadeed.
- In la oggolaado doorasho qaran oo heshiis lagu yahay, si dalka looga gudbiyo marxaladda kumeel-gaarka ah loona dhiso hay’ado sharciyad buuxda leh.
- In la aqbalo doorashadii Jubbaland, islamarkaana la joojiyo waxa uu ku tilmaamay “duulaanka” siyaasadeed ee ay dowladda federaalka iyo Puntlandba wadaan.
Qoraalka wasiirka ayaa imanaya xilli uu cirka isku sii shareerayo khilaafka siyaasadeed ee u dhexeeya Puntland iyo dowladda federaalka, iyadoo ay isa soo tarayaan baaqyada loo jeedinayo labada dhinac si loo helo xal siyaasadeed oo lagu gaari karo midnimo qaran.
