Wararka naga soo gaaraya degmada Caabudwaaq ee gobolka Galgaduud ayaa sheegaya inuu halkaasi ka dhacay dagaal culus oo sababay khasaare Dhimasho iyo dhaawac ah, kadib markii maleeshiyaad hubeysan ay weerar ku qaadeen saldhigga Booliska degmada.
Dagaalka ayaa qarxay xilli xiisad la xiriirta dhismo cusub oo laga wado saldhigga Caabudwaaq ay maalmahan dambe ka taagneyd magaalada.
Sida ay xaqiijiyeen ilo deegaanka ah, muranka ugu weyn ayaa salka ku haya jihada loo jeedinayo ilinka ama albaabka cusub ee saldhigga, taas oo maleeshiyaadka weerarka qaaday ay si cad uga soo horjeesteen.
Maleeshiyaadka ayaa diidan in ilinka laga jeediyo dhanka ay ku yaalaan hoteello iyo goobo ganacsi, iyaga oo ka cabsi qaba in amniga, dhaqaalaha iyo ganacsiga deegaanka uu saameyn ku yeesho jihada cusub ee laga dhisayo albaabka.
Wararka hordhaca ah waxay sheegayaan in ugu yaraan 6 qof ay ku dhinteen dagaalka, kuwaas oo isugu jira maleeshiyaad, askar boolis ah iyo dad shacab ah. Sidoo kale, 2 qof oo kale ayaa ku dhaawacmay is-rasaaseynta oo socotay muddo saacado ah.
Xaaladda magaalada ayaa weli kacsan, waxaana laga cabsi qabaa in dagaalku uu dib u qarxo haddii aan la helin xal siyaasadeed oo degdeg ah.
Ilaa iyo hadda maamulka degmada iyo saraakiisha ammaanka kama aysan hadlin xaaladda cusub, inkasta oo warar hoose ay sheegayaan in la wado dadaallo lagu doonayo in lagu joojiyo colaad hor leh.
