Madaxweynaha Jubaland, Axmed Maxamed Islaam, ayaa maanta booqasho dhiirigelin ah ugu tagay Ciidamada Gurmad Qaran ee Hay’adda Nabadsugidda iyo Sirdoonka Jubaland, iyo sidoo kale Ciidamada Kumaandooska Danab, kuwaas oo maalmihii u dambeeyay howlgallo guulo waaweyn laga gaaray ka fulinayay qeybo badan oo ka tirsan Jubaland.
Howlgalladaasi ayaa lagu naafeeyay kooxaha Khawaariijta, iyadoo lagu burburiyay saldhigyo iyo qorshayaal khatar ku ahaa nabadda iyo amniga shacabka Jubaland.
Madaxweynaha ayaa si gaar ah u bogaadiyay geesinimada, dadaalka naf-hurnimada ah iyo masuuliyadda culus ee ay ciidanku u hayaan difaaca dalka.
Madaxweynaha ayaa intaas ku daray in guulaha laga gaaray howlgalada ay farxad iyo yididiilo u horseedeen shacabka Jubaland iyo guud ahaan ummadda Soomaaliyeed, islamarkaana ay muhiim tahay in la sii dardar geliyo howlgallada ilaa laga ciribtirayo kooxaha Khawaariijta ee cadowga ku ah dalka iyo dadka.
