Wararka naga soo gaaraya magaalada Dhahar ee gobolka Sanaag ayaa sheegaya in uu halkaas ka qarxay dagaal culus oo u dhexeeya ciidamo ka amar qaata Maamulka Puntland iyo ciidamo deegaanka ah oo ka tirsan Beesha Maakhir, kuwaasoo si buuxda u taageersan dhismaha maamulka Maakhir iyo shirka ka socda magaalada Laascaanood ee lagu dhisayo maamulka Khaatumo.
Rasaasta ayaa si xooggan uga bilaabatay Xaafadda Sare ee magaalada Dhahar, halkaasoo ah gudaha laga soo galo magaalada, islamarkaana ay ku sugan yihiin fariisimo ay leeyihiin ciidamada deegaanka Beesha degta magaaladaasi.
Dagaalka ayaa u muuqda mid salka ku haya khilaaf siyaasadeed oo ka dhashay mowqifka kala duwan ee ay labada dhinac ka taagan yihiin arrinta ku biirista Maakhir ee maamulka SSC-Khaatumo, iyo in magaalada Dhahar ay qeyb ka noqoto nidaamkaasi cusub.
Illaa iyo hadda faahfaahin rasmi ah lagama hayo khasaaraha ka dhashay dagaalka, balse wararka qaar ayaa sheegaya in laga cabsi qabo in xaaladdu faraha ka baxdo haddii aan si degdeg ah loo joojin dagaalka.
Dagaalkan ka socda magaalada Dhahar ayaa imaanaya xili magaalada Laascaanood uu ka socdo Shirweynaha lagu dhameystirayo dhismaha maamulka SSC Khaatuma.
