Waxaa maanta buuq iyo sawaxan xooggan uu ka taagan xarunta Golaha Shacabka ee Baarlamaanka Soomaaliya, xilli xildhibaanada labada aqal la horgeynayo hindise wax-ka-beddel lagu sameynayo shan cutub oo cusub oo ka mid ah Dastuurka KMG ah.
Xildhibaanada mucaaradka ayaa deg deg u gaaray xarunta Baarlamaanka, iyagoo la wareegay masraxa, kuna muujinaya diidmo adag oo ay ka qabaan sii wadista wax-ka-beddelka Dastuurka.
Xildhibaano watay firinbi ayaa buuq ka abuuray hoolka, taasoo oo muuqato inay ku soo bandhigayaan awoodooda.
Sidoo kale, xildhibaanada mucaaradka ayaa qaaday heesta Calanka Qaranka, taasoo beddeshay jawigii hoolka, una muuqatay farriin ay ku muujinayaan midnimo iyo mowqifkooda siyaasadeed.
Dhanka kale, waxaa weli maqan guddoonka Baarlamaanka, taasoo sii murjisay xaaladda, isla markaana keentay in kulanka uu dib u dhac ku yimaado.
Xaaladda ayaa weli kacsan, waxaana la sugayaa sida ay u wajahaan guddoonka iyo madaxda Baarlamaanka, si loo xakameeyo buuqa loona sii wado howlaha sharci-dejinta.
