Dowladda Soomaaliya iyo Maamulka Galmudug ayaa xabbad-joojin rasmi ah oo lagu dhaqan geliyay deegaanada u dhexeeya Huurshe, Xeraale, ilaa Caabudwaaq, kuwaas oo mudooyinkii la soo dhaafay ahaa goobo colaadeed oo ay ka dhaceen dagaallo sababay dhimasho iyo dhaawac badan.
Ciidamada Xoogga Dalka Soomaaliyeed, gaar ahaan Qeybta 21-aad, oo ay wehliyaan ciidamada Madaxtooyada Galmudug, ayaa si rasmi ah ula wareegay sugidda amniga, waxaana ay haatan ku sugan yihiin dhammaan isgoysyada iyo goobihii dagaalladu ka dhaceen. Ciidamada waxay sameeyeen howlgal lagu xaqiijinayo xasilloonida amniga iyo in laga hortago in dagaalladu sii socdaan.
Xabbad-joojinta ayaa la filayaa inay noqoto fursad lagu bilaabo dadaallada nabadeed, iyadoo mas’uuliyiinta amniga ay xaqiijiyeen in la gaaray heshiis xabbad-joojin rasmi ah. Waxaa sidoo kale la qorsheynayaa in maalmaha soo socda la furo gogol nabadeed, si dhinacyada is-haya ay isugu yimaadaan ugana wada hadlaan xallinta khilaafaadka ka dhex jira.
Mas’uuliyiinta Galmudug ayaa ugu baaqay bulshada ku nool deegaanadaasi inay ilaaliyaan nabadda ayna la shaqeeyaan hay’adaha ammaanka si loo xaqiijiyo xasillooni waarta. Waxaa sidoo kale la xusay in hawlaha nabadeed ee la bilaabayo ay muhiim u yihiin dib u dhiska bulshada iyo xoojinta isfahamka dhex mara dadka deegaannadaas.
Ciidanka Xoogga Dalka Qaybta 21-aad iyo Ciidamada Madaxtooyada Galmudug ayaa si guul leh u kala dhexgalay maleeshiyo beeleedkii ku dagaalamay deegaanada isgoyska u dhexeeya Laandheer iyo Huurshe.
Kulamo gaar ah ayaa loo sameeyay odayaasha dhaqanka ee dhinacyada dagaalamay, iyadoo wasiirada Shaqada iyo Shaqaalaha iyo Ganacsiga ee Galmudug, iyo saraakiisha ciidamada, ay kulan la yeesheen odayaasha si loo adkeeyo muhiimadda nabadda iyo wada-shaqeynta bulshada.
