Agaasimaha hay’adda Socdaalka iyo jinsiyadda Xuseen Iidow ayaa maanta go’aan uu soo saaray ku sheegay in muwaadiniinta Soomaaliyeed aan loo oggolaan doonin inay dalka Masar ugu safraan nidaamka Visaha “On Arrival” ama “Ok to Board”, inkasta oo nidaamkaas ay ogoshay dowladda Masar oo aysan wax go’aan diidmo ah aysan kasoo saarin.
Go’aankan oo saacad ka hor la soo saaray ayaa si degdeg ah loogu dabaqay rakaabkii maanta ku qornaa diyaaradda EgyptAir ee qorshuhu yahay 03:30 galabnimo ka duusho magaalada Muqdisho, waxaana la sheegay in qaar kamid ah rakaabka laga reebayo safarka ayagoo ku xayiran garoonka diyaaradaha Muqdisho.
Dad badan oo watay Visaha “On Arrival”, kuwaas oo u badnaa bukaano caafimaad u aadayay Masar, ayaa ku xayiran garoonka diyaaradaha Aadan Cadde, iyagoo wajahaya jahwareer iyo walaac la xiriira safarkooda iyo xaaladahooda caafimaad.
Go’aanka ayaa dhaliyay su’aalo badan oo ku saabsan sharciyadda xayiraadda maadaama nidaamka “Ok to Board” uu ahaa hab ay si rasmi ah u aqbashay dowladda Masar.
