Ciidanka Qaranka Soomaaliya ee ka howlgala gobolka Gedo ayaa saaka aroortii hore iska caabiyay weerar lagu qaaday fariisimahooda duleedka degmada Beledxaawo.
War ka soo baxay Wasaaradda Gaashaandhigga ayaa lagu sheegay in weerarka ay soo qaadeen maleeshiyaad uu hoggaaminayay Maxamuud Sayid Aadan. Ciidanka Qaranka ayaa ku guuleystay inay kala eryaan weeraryahannada, ayna qabtaan toban qof oo ka mid ah, iyadoo sidoo kale la sheegay in ciidamada ay la wareegeen goobihii weerarka laga soo abaabulay.
Intii uu socday iska caabinta weerarka, laba askari oo ka tirsan Ciidanka Xoogga Dalka ayaa ku geeriyooday — Laba-xiddigle Maxamed Xasan Guutaale iyo Dable Cali Muxumed Gooni — halka saddex kale ay ku dhaawacmeen, kuwaas oo hadda lagu dabiibayo xarumo caafimaad.
Wasaaradda Gaashaandhigga ayaa sheegtay in xaaladda deegaanka ay hadda deggen tahay, islamarkaana ciidamada Qaranka ay sii wadaan hawlaha xaqiijinta amniga iyo ilaalinta xasilloonida gobolka.
Warsaxaafadeedka ayaa sidoo kale ku baaqay in dadka deegaanka ay la shaqeeyaan ciidamada amniga si looga hortago fal kasta oo carqalad ku ah nabadda iyo midnimada dalka.
