Taliyaha Ciidanka Xoogga Dalka Soomaaliyeed, Gen. Odawaa Yuusuf Raagge, ayaa si adag uga hadlay ciqaabta ay mudan yihiin askar ama saraakiil ku kaca khiyaano qaran ama falal lid ku ah sharciga iyo sharafta ciidanka.
Hadalka Taliyaha ayaa yimid kaddib markii maanta Maxkamadda Ciidamada Qalabka Sida ay xukun dil toogasho ah ku fulisay labo askari oo ka tirsanaa ciidanka dowladda Soomaaliya, kuwaas oo lagu helay dambiga ah inay dileen Abaanduulihii Ururka 83-aad ee Xoogga Dalka Soomaaliyeed, Ex-Dhamme Ceydiid Maxamed Cali. Dilka toogashada ayaa ka dhacay fagaaraha deegaanka Sabiid iyo Caanoole ee Gobolka Shabeellaha Hoose.
Gen. Odawaa ayaa ku adkeeyay in aanay jiri doonin cid ka sarreysa sharciga, darajo ama xil uu doono ha lahaadee, isla markaana qof kasta oo ku kaca khiyaano qaran ama dil sharci-darro ah lagu horgeyn doono fagaaraha cadaaladda.
Taliyaha CXD ayaa xusay in ciidanku uu ku dhisan yahay nidaam, kala dambeyn iyo ilaalinta sharciyada dalka, isagoo shacabka ugu baaqay inay taageeraan ciidamada geesiyaasha ah ee naftooda u hura difaaca qaranka.
