Madaxweynaha Jamhuuriyadda Federaalka Soomaaliya Mudane Xasan Sheekh Maxamuud oo khudbad dhinacyo badan taabaneysay ka jeediyay munaasabadda caleema-saarka hoggaamiyaha maamulka Koonfur Galbeed Aadan Maxamed Nuur ( Aadan Madoobe), ayaa carabka ku adkeeyay in shacabka Soomaaliyeed ka daaleen siyaasad qofeysan, islamarkaana Dowladda Federaalka iyo maamulada xubnaha ka ah ay isla garteen in dalka dib-u-habeyn siyaasadeed laga sameeyo dalkana uu u jiheysto siyaasad xisbi iyo doorasho qof iyo cod ah.
“ Dowladda Federaalka iyo Dowlad gobolleedkada in badan oo ka mid ah waxaa la iska gartay dalka in dib-u-habeyn siyaasadeed oo rasmi ah laga sameeyo oo sida adduunyada ay taqaano u dhaqano, Siyaasad qofeysan Soomaaliya way kasoo daashay mana kusii jireyso, waxaana dalka ka hana-qaaday Siyaasad leh nidaam la yaqaano oo shacabku leeyahay.”
Sidoo kale, madaxweynaha ayaa tilmaamay in doorashooyinkii nabadoonaa ee taariikhiga ahaa ee qabsoomay ay direen fariin doorasho qof iyo cod ah oo dadka Soomaaliyeed ay baahi weyn u qabeen, isaga oo xusay in dalka intiisa kale la gaarsiinayo doorashooyinka tooska ah ee hadda socda.
“Dadka Soomaaliyeed waxay direen fariin doorasho qof iyo cod ah, dalka intiisa kale waa la gaarsiinayaa waana ka dhaqan-geleysaa.”
Madaxweynaha JFS Dr. Xasan Sheekh Maxamuud ayaa hoosta ka xariiqay in doorashooyinkii taariikhiga ah ee ka qabsoomay deegaannada Koonfur Galbeed ay astaan u yihiin jihada cusub ee Soomaaliya u qaaday dhanka dimuqraadiyadda, xasilloonida iyo Dowlad dhiska, wuxuuna carabka ku adkeeyay in uu dalka ka gudbay xilligii ay doorashooyinka ku koobnaayeen dano gaar ah iyo siyaasado shaqsi ku saleysan.
Madaxweyne Xasan Sheekh”Dadka Soomaaliyeed waxay direen fariin doorasho qof iyo cod ah
NAGU SOO BIIR
