War ka soo baxay Ciidamada NISA ayaa lagu sheegay in iyagoo kaashanaya ciidamada xoogga ay howlgal duqeyn ah lagu dilay xubno ka tirsanaa Maleeshiyaadka Al-shabaab ay ka fuliyeen deegaanno ka tirsan Gobolka Shabeellaha Dhexe.
Howlgalka ayaa xalay ka dhacay deegaanka Geelgub ee Gobolka Shabeellaha Dhexe, waxaana lagu dilay 21 xubnood oo isugu jiray horjoogeyaal iyo maleeshiyaad ka tirsanaa Khawaarijta.
“Howlgalkan lagu beegsaday Khawaarijta ayaa u dhacay sidii loo qorsheeyay, iyada oo lagu guuleystay in hal goob lagu soo afjaro nolosha dhammaan xubnihii Khawaarijta ee bartilmaameedka u ahaa,” ayaa lagu yiri qoraalka
Sidoo kale qoraalka ayaa waxaa lagu sheegay in howlgalkaan lagu burburiyay gaadiid dagaal iyo saanad ciidan oo ay leeyihiin kooxda Al-shabaab.
Ma jiro ilo ka madax banaan oo xaqiijin kara warka soo ka soo baxay taliska Hay’adda Nabad sugida Soomaaliya.
Todobaadyadii ugu dambeeyay ayaa waxaa kordhay duqeymaha ay Dowladda Soomaaliya la beegsanayso Maleeshiyaadka Al-Shabaab kadib markii ay kooxdu soo qaaday weerarro is-dabajoog ah.
Gobolka Shabeelada Dhexe ayaa waxaa weli ka socda guluf dagaal oo ka dhan ah maleeshiyaadka Al-shabaab, iyadoona ciidamadii ugu badnaa ay ku sugan yihiin gobolkaasi, waxaana la filayaa in dhawaan ay dowladda Soomaaliya ay bilowday howlgalka wejigiisa labaad, kaasi oo Al-shabaab looga saaarayo deegaanada Hirshabelle iyo Galmudug.
