Magaalada Balad-Xaawo ee gobolka Gedo ayaa saaka ku waabariisatay xaalad deggan, inkastoo cabsi xooggan laga qabo in dagaallo cusub ay markale ka qarxaan, kaddib iska hor-imaad culus oo shalay dhexmaray ciidamo taabacsan dowladda Federaalka iyo kuwa maamulka Jubbaland, oo uu hoggaaminayo Cabdirashiid Janan.
Wararka laga helayo magaalada oo ay go’an tahay isgaarsiinteedu muddo ku dhow toddobaad ayaa tilmaamaya in xaaladda nololeed ay aad u liidato, iyadoo dadka shacabka ah ay wajahaan dhibaatooyin dhanka cunnada, biyaha iyo adeegyada kale ee aasaasiga ah.
Barakac hor leh ayaa laga soo sheegayaa magaalada, iyadoo boqolaal qoys u qaxeen duleedka Balad-Xaawo iyo xuduudaha dalalka Kenya iyo Itoobiya, si ay uga badbaadaan colaadda ka aloosan gudaha magaalada.
Goobjoogayaal ayaa sheegay in labada dhinac ee dagaallamay weli ku sugan yihiin deegaannadii ay horay u kala joogeen.
Ciidamada Dowladda Federaalka Soomaaliya ayaa ku sugan Xerada UK, halka kuwa Jubbaland ay weli ku sugan yihiin gudaha magaalada Balad-Xaawo.
Dadweynaha deegaanka ayaa muujinaya walaac xooggan, iyaga oo ka baqdin qaba in dagaalku dib u qarxo, maadaama aysan jirin wax heshiis ah oo laga gaaray xiisadda taagan.
Dowladda Federaalka iyo maamulka Jubbaland ayaa horay ugu eedeeyay midba midka kale inuu hurinayo dagaal, taas oo sii adkaynaysa xal u helidda colaadda gobolka Gedo.
