Xildhibaanno ka tirsan labada aqal ee Baarlamaanka Federaalka Soomaaliya kuna midoobay Madasha Samata-Bixinta Qaranka Soomaaliyeed ayaa si adag uga digay xaalado colaadeed oo ay sheegeen in Dowladda Federaalka Soomaaliya ka hurinayso Gobollada Sanaag iyo Gedo.
Qoraal war-saxaafadeed ah oo ay soo saareen ku sheegeen in dowladda Federaalka ay mas’uul ka tahay kicinta colaadda maanta ka dhacday magaalada Dhahar ee gobolka Sanaag, taasoo ay ku eedeeyeen Madaxweyne Xasan Sheekh iyo Ra’iisul Wasaare Xamse.
Waxaa kale oo ay sheegeen in gobolka Gedo si ula kac ah looga wado abaabul colaadeed, iyadoo la doonayo in lagu khalkhal geliyo dadka deegaanka oo markii horeba la daalaa-dhacayay dhibaatooyin nololeed.
Waxa ay sidoo kale xuseen in dowladda ay gabi ahaanba joojisay duulimaadyadii tegayay degmooyinka Gedo iyo Doolow, taasoo ay ku tilmaameen cadaadis siyaasadeed oo si toos ah u saameynaya nolosha shacabka.
Xildhibaanadan ayaa uga digay dowladda Federaalka in ay sii waddo talaabooyin noocan ah, iyagoo sheegay in ay u arkaan colaad hurin iyo halis weyn oo lagu wiiqayo deganaanshaha dalka.
