Hay’adda Sirdoonka iyo Nabadsugidda Qaranka (NISA) ayaa sheegtay inay howlgal qorsheysan oo ay kaashanayeen saaxiibada caalamiga ah ka fuliyeen deegaanka Tardo ee gobolka Hiiraan, kaas oo lagu beegsaday fariisimo iyo agab ay kooxda Al-Shabaab u adeegsan jirtay weerarro iyo dhaqdhaqaaqyo militari.
Bayaan kasoo baxay NISA ayaa lagu sheegay in ugu yaraan shan xubnood oo ka tirsan Al-Shabaab lagu dilay howlgalka, kaddib markii la helay xog sirdoon oo muujinaysay in deegaanka lagu uruuriyay maleeshiyaad lagu qiyaasay 25 xubnood, kuwaas oo isugu jiray dagaalyahanno iyo saraakiil ka tirsan kooxda.
Sida ay hay’addu sheegtay, xubnahaasi ayaa qorsheynayay dhaqdhaqaaqyo lagu carqaladeynayo amniga iyo xasilloonida gobolka Hiiraan, taasoo sababtay in la qaado howlgalka lagu bartilmaameedsaday goobaha ay ku sugnaayeen.
NISA waxay intaas ku dartay in ciidamada fuliyay howlgalka ay si gaar ah u beegsadeen xarumo iyo goobaha gabaadka u ahaa kooxda, iyadoo la burburiyay fariisimo iyo agab ciidan oo loo adeegsan jiray isku socodka, maamulka iyo hawlgallada Al-Shabaab.
Sidoo kale NISA ma soo bandhigin magacyada iyo sawirada maleeshiyaadka Al-Shabaab ay sheegtay in la dilay.
Dowladda Federaalka Soomaaliya ayaa muddooyinkii u dambeeyay xoojisay howlgalada ka dhanka ah Al-Shabaab, iyadoo ciidamada dowladda iyo kuwa deegaanka ay dagaallo ka wadaan deegaanno badan oo ku yaalla bartamaha iyo koonfurta dalka.
Mas’uuliyiinta dowladda ayaa sheegay in howlgaladan ay qayb ka yihiin dadaallada lagu wiiqayo awoodda kooxda iyo sugidda amniga deegaannada laga saaray maleeshiyaadka Al-Shabaab.
