Wasiirka Difaaca Turkiga, Yaşar Güler, ayaa shaaca ka qaaday in dalal dhowr ah oo ku yaalla Geeska Afrika ay ka codsadeen dowladda Turkiga inay ka hirgeliso qaabka iskaashiga amni iyo difaac ee ay ka waddo Soomaaliya.
Yaşar Güler ayaa sheegay in Turkigu ay ka go’an tahay inuu sii xoojiyo taageerada uu siiyo Ciidanka Xoogga Dalka Soomaaliyeed, gaar ahaan hawlgallada lagula dagaallamayo kooxaha argagixisada, isla markaana la sugo amniga mashaariicda istaraatiijiga ah ee Turkigu ka fulinayo Soomaaliya.
“Waxaan go’aansannay inaan sii wadno taageerada ugu badan ee aan siineyno hawlgallada ka dhanka ah argagixisada ee Ciidanka Xoogga Dalka Soomaaliyeed, iyo inaan sugno amniga howlaha qodista shidaalka iyo mashruuca xarunta dayax-gacmeedka iyo goobta tijaabada gantaallada ee laga dhisayo Soomaaliya,” ayuu yiri wasiirku.
Wuxuu intaas ku daray in dalal kale oo ku yaalla Geeska Afrika ay codsadeen in Turkigu uga hirgeliyo nidaam la mid ah kan Soomaaliya si loo xoojiyo nabadda, xasilloonida iyo amniga badda.
“Dalal dhowr ah oo ku yaalla Geeska Afrika ayaa naga codsanaya isla qaabka aan ka hirgelinay Soomaaliya si loo xaqiijiyo nabad, xasillooni iyo amni badeed, waxaana hadda ku guda jirnaa qiimeynta codsiyadooda,” ayuu hadalkiisa ku daray Yaşar Güler.
Wasiirka Difaaca Turkiga ma uusan magacaabin dalalka uu tilmaamay, balse wuxuu xusay inay yihiin waddamo ka tirsan gobolka Geeska Afrika, kuwaas oo doonaya inay ka faa’iideystaan khibradda iyo iskaashiga amni ee Turkigu ka hirgeliyay Soomaaliya.
