Madaxweynaha Jubaland, Axmed Maxamed Islaam, ayaa wada-hadallo khadka telefoonka ah la yeeshay Wakiillada Beesha Caalamka ee Soomaaliya.
Intii lagu jiray wada-hadalladaasi, Madaxweynaha iyo Wakiillada Beesha Caalamka waxay si qoto dheer uga wada hadleen muhiimadda ay leedahay in si degdeg ah la iskugu yimaado madal loo dhan yahay, si go’aan looga gaaro arrimaha hortabinta leh ee ay ka mid yihiin Dastuurka, Doorashooyinka, iyo dagaalka lagula jiro argagixisada.
Madaxweyne Axmed Maxamed Islaam ayaa uga mahadceliyay Beesha Caalamka taageerada ay mar walba la garab taagan yihiin Ummada Soomaaliyeed.
Kulankan ayaa imaanaya xili Xubnaha Beesha Caalamka kol sii horeysay ay kulamo la qaateen Madaxweynaha maamulka Puntland Saciid Cabdullaahi Deni.
Sidoo kale kulamadan ayaa waxaa ay ku soo aadayaan xili dowladda Soomaaliya ay wado in ay qabato shir ay isugu imaanayaan siyaasiyiinta mucaaradka, hoggaanka ururada Siyaasadda iyo qeybaha kala duwan ee Bulshada.
Beesha Caalamka ayaa bilaabay in ay caddaadis saaraan madaxda dowladda Federaalka Soomaaliya iyo kuwa maamul goboleedyada.
